Оғози мусобиқаи байналмилалӣ аз намуди гуштини юнону румӣ миёни наврасон

Дар ин мусобиқа, ки тайи ду рӯз (11-12 май) идома хоҳад ёфт, варзишгарони навраси Ҷумҳуриҳои Қазоқистон, Қирғизистон ва аз тамоми минтақаҳои Ҷумҳурии Тоҷикистон ширкат меварзанд.

Дар маросими тантанавии кушодашавии мусобиқаи байналмилалӣ муовини Вазири корҳои дохилӣ генерал-майори милитсия Навҷувонов Абдулло Шанбиевич суханронӣ намуда, ба иштирокчиён барои дарёфти ҷойҳои намоён комёбиҳо таманно кард.

Мавсуф меҳмонони аз кишварҳои ба мо дӯсту ҳамсоя Қазоқистону Қирғизистонро ба сарзамини меҳмоннавози тоҷикон хайрамақдам гуфта, зикр кард, ки варзиш таҳкимбахши дӯстию рафоқат миёни халқҳо ва пеш аз ҳама кафили саломатист.

Қобили қайд аст, ки муҳорибаи гуштини тарзи юнону румӣ таърихи қадима дорад, вале имрӯзҳо ин намуди варзиш миёни варзишгарони ҷавону наврас маҳбубияти зиёд пайдо мекунад. Сол то сол ба ин намуди варзиш хоҳишмандон пайваста, дар мусобиқаҳои сатҳи байналмилаллӣ ва ҷаҳонӣ баромад менамоянд.

Боиси хурсандист, ки ташкилотҳои «Динамо»-и кишварҳои аъзои Иттиҳоди Давлатҳои Мустақил ба рушди варзиш таваҷҷӯҳи хоса дошта, мусобиқаи имрӯза далели гуфтаҳои болост. Боварӣ аст, варзишгарони наврас дар ин мусобиқа фаъолона иштирок намуда, ҷойҳои намоёнро ишғол намуда, парчамбардори кишвари худ мегарданд.

Дар идомаи чорабинӣ, ба муносибати кушодашавии мусобиқаи мазкур аз номи роҳбарияти Вазорати корҳои дохилӣ мураббиён - намояндагони Қазоқистону Қирғизистон, инчунин собиқадорони соҳаи гуштини тарзи юнону румии ҷумҳурӣ бо тӯҳфаҳои хотиравӣ сарфароз гардонида шуданд.

Айни замон, варзишгарон аз рӯи дараҷаи вазн тақсимбандӣ гардида истода, барои қувваозмоӣ омодагӣ мебинанд.

Доварии мусобиқаро устодони варзидаи сатҳи байналмилалӣ: сардовар Олим Алоназаров, доварон Наврӯз Назаров, Субҳон Абдукаримов, Ҳабиб Абдуллоев, Фаррухруз Раҳмонов, Баҳром Орипов ва дигарон ба зимма доранд.